Vísindaleiðangur var farinn í Eldey í dag. Leiðangurinn skipuðu sérfræðingar frá Náttúrustofu Suðvesturlands, Háskóla Íslands og Náttúrufræðistofnun Íslands auk landvarða Umhverfisstofnunar. Viðfangsefni leiðangursfólks var mæling á gliðnun og hæð eyjunnar, súlnadauði og plast í hreiðrum súlna. Mikið sást af dauðum súlum í eyjunni og var aðallega um fullorðnar súlur að ræða. Fyrirfram var vitað að töluvert plast væri í hreiðrum súla í Eldey en það fékkst staðfest eftir leiðangur Náttúrustofunnar árið 2017. Í þeim leiðangri var eyjan öll mynduð með dróna og varpstofn metinn, sást þá töluvert af plasti af drónamyndunum. Það gríðarlega magn plasts sem blasti við leiðangursfólki í dag var mun meira en búist var við. Ljóst er að plast er allsráðandi byggingarefni í hreiðri súlna í eyjunni, en aðallega er um að ræða netabúta og veiðarfæraspotta af öllum gerðum. Töluvert fannst af súlum sem drepist höfðu eftir að hafa flækt sig í plastruslinu, en ætla má að fjöldi súla drepist með þessum hætti árlega í Eldey. Auk svartbaks og silfurmáfs sáust fálki, svartþrestir og bjargdúfur - bæði á eyjunni eða á flugi við hana. Ferðin gekk vel og þökkum við landhelgisgæslunni og áhöfn TF-GNÁ kærlega fyrir öruggan flutning.
0 Comments
Í nýjasta tölublaði Ægis sem var að koma út er fjallað um vöktun Náttúrustofunnar og Rannsóknaseturs HÍ á Suðurnesjum á grjótkrabba í Faxaflóa,
Í nýrri yfirlitsgrein í vísindaritinu Journal of Environmental Management er fjallað um niðurstöður samantektar á birtum heimildum um tjón af völdum framandi tegunda á Norðurlöndum. Um er að ræða Norrænt samstarfsverkefni sem Náttúrustofa Suðvesturlands ásamt Náttúrustofu Vesturlands tóku þátt í fyrir hönd Íslands.
Ágrip greinarinnar í lauslegri þýðingu: "Heildarumfang efnahagslegra áhrifa og sérstaklega á fjárhagslegu tjóni sem hlýst af framandi ágengum tegundum skortir fyrir Norðurlönd. Þessi grein tekur saman niðurstöður heimilda um kostnað vegna framandi tegunda á Norðurlöndunum ásamt mati sérfræðinga. Hinn alþjóðlegi InvaCost gagnagrunnurinn var notaður við greiningu kostnaðar, en gagnagrunnurinn er alþjóðleg opin hýsing fjárhagslegs kostnaðar vegna framandi tegunda. Grunnurinn gerir kleift að nota tímabundnar, staðbundnar og flokkunarfræðilegar lýsingar sem auðvelda betri skilning á því hvernig kostnaði er dreift. Heildarkostnaður vegna framandi tegunda á Norðurlöndunum var áætlaður 8,35 milljarðar Bandaríkjadala (á gengi ársins 2017), en þar vegur kostnaður vegna tjóns umtalsvert þyngra en stjórnunarlegur kostnaður. Noregur varð fyrir mestum tjóni (3,23 milljarðar dala), næst á eftir komu Danmörk (2,20 milljarðar), Svíþjóð (1,45 milljarðar), Finnland (1,11 milljarðar) og Ísland (25,45 milljónir). Kostnaður vegna landnáms framandi tegunda á Norðurlöndum virðist að mestu vera vanmetinn. Í lok greinar er varpað ljósi á slíkar þekkingareyður, þar á meðal í stefnum og reglugerðum og þörfina á að auka skilning á kostnaði við framandi tegundir og eflingu rannsókna í þessum málaflokki til framtíðar." Greinin er opin öllum í takmarkaðan tíma og má nálgast hana með því að smella á myndina hér að neðan: Dagana 29. og 30. ágúst var haldið námskeið á Náttúrustofu Suðvesturlands í sýnatökum í fjöruvistgerðum. Námskeiðið var ætlað starfsfólki náttúrustofanna og er hluti af þjálfun þess í tengslum við verkefnið Vöktun náttúruverndarsvæða, samstarfsverkefni náttúrustofa og Náttúrufræðistofnunar Íslands. Fyrri dag námskeiðsins var farið í bæði þangfjöru og leiru og aðferðir sýndar og prófaðar, auk þess sem farið var í helstu þörungagreiningar. Seinni daginn var unnið úr þeim sýnum sem tekin voru og greint úr þeim bæði í hópa- og tegundir. Hópurinn fékk hressilega lægð á meðan námskeiðinu stóð með tilheyrandi roki og rigningu, en veðrið fékk lítið á mannskapinn enda náttúrufræðingar öllu vanir þegar kemur að útivinnu. Þökkum við félögum okkar á náttúrustofunum og NÍ fyrir ánægjulega samveru. Í nýjasta tölublaði Fiskifrétta sem út kom í dag 25.ágúst er fjallað um vöktun Náttúrustofunnar og Rannsóknaseturs HÍ á Suðurnesjum á grjótkrabba í Faxaflóa,
Starfsmenn Náttúrustofunnar og Rannsóknaseturs HÍ á Suðurnesjum fóru í dag með nemendur á þriðja ári í líffræði við Háskóla Íslands í sýnatökur á Sundin við Reykjavík. Sjóferðin er hluti af fjölbreyttu og umfangsmiklu vettvangsnámskeiði í vistfræði. Þetta er sjötta árið sem nemendum hefur boðist að fara á sjó með okkur og fá innsýn í rannsóknarvinnu okkar og fá kost á að læra réttu handtökin. Gerast nemendur í vettvangsnámskeiðinu því þáttakendur í mikilvægri vöktun á stofnbreytingum á hinum nýja landnema grjótkrabba. Nemendur fengu ljómandi fínt veður og stóðu sig með mikilli prýði. Í nýrri yfirlitsgrein okkar í vísindaritinu Polar Biology er fjallað um fjölbreytileika mosadýra (Bryozoa) við Ísland. Um er að ræða alþjóðlegt samstarfsverkefni sem Náttúrustofan leiddi.
Ávöxtur þessa verkefnis er uppfærður heildarlisti yfir mosadýrategundir við Ísland. Alls eru nú skráðar 288 tegundir mosadýra við Ísland, þar af 67 nýjar skráningar við Ísland og þrjár tegundir sem mögulega eru framandi tegundir. Slíkur fjölbreytileiki er tiltölulega hár í samanburði við önnur hafsvæði, samt má búast við við því að hann sé í raun enn hærri - en frekari rannsóknir þarf til að leiða það í ljós. Mestur fjöldi tegunda (71) var skráður grynnst (0–100m), en það er líklegast vegna flókinna þátta þar á meðal mikillar frumframleiðni þess svæðis. Sem fyrr segir leiðir rannsóknin í ljós skráningu fjölda nýrra tegunda við Ísland, sem sýnir hversu lítið er vitað um fjölbreytileika mosdýra og vistfræðilega þætti þeirra á jafn mikilvægu svæðum og Íslandsmið eru. Þetta er upphafspunktur fyrir frekari ítarlegar rannsóknir á þessum sérstaka hópi lífvera. Smella má á myndina til að nálgast greinina: Sextánda vöktunarár grjótkrabba í Faxaflóa er nú hafið. Náttúrustofan og Rannsóknasetur Háskóla Íslands á Suðurnesjum halda utan um vöktunina. Byggist vöktunin á gildruveiðum fullorðinna krabba og eins á svifsýnatökum með háfum til að fylgjast með fjölda lirfa í uppsjó. Ljóst er á gildruveiðum að grjótkrabbinn er hvergi að gefa eftir og er sem fyrr ráðandi í afla, með yfir 99% í aflahlutdeild. Sýkingarhlutfall er sem fyrr hlutfallslega hátt og unnið er að því í samstarfi við sérfræðinga á Keldum að greina hvað henni veldur. Hér að neðan má sjá myndir úr fyrsta leiðangri þessa vöktunarárs. Í vikunni lauk hinni árlegu bjargfuglavöktun Náttúrustofunnar á Suðurnesjum. Krýsuvíkurberg er í dag eina fuglabjargið á suðvesturhorninu sem fellur undir árlega vöktun og er jafnframt það langstærsta. Í ár var staðan einnig tekin sérstaklega í Eldey, Karlinum, Hafnabergi og Hólmsbergi í tengslum við landsúttekt Náttúrufræðistofnunar Íslands á bjargfuglum sem fer fram á 5-10 ára fresti. Bjargfuglavöktunin gengur þannig fyrir sig að teknar eru myndir á föstum sniðum og út frá myndunum er skráður fjöldi rituhreiðra, fýlssetra og svartfugla. Einnig er talinn fjöldi svartfugla á sjó á viðkomandi stað til að fá samanburð á hlutfalli tegunda sem sjást í bjargi. Á þeim svæðum sem falla undir fasta vöktun á landinu (eins og Krýsuvíkurberg) er svo farið er aftur seinna á varptíma til að áætla varpárangur ritu. Árleg bjargfuglavöktunin fer fram víðsvegar um land í samstarfi náttúrustofa og hefur Náttúrustofa Norðausturland haft yfirumsjón með verkefninu. Í dag heimsóttu blaðamennirnir Patrícia Carvalho og Nuno Ferreira Santos frá potúgalska dagblaðinu Público Náttúrustofuna. Ástæða heimsóknarinnar var viðtal við okkar einu sönnu Joana. Viðtalið er hluti af verkefni sem styrkt er af Uppbyggingarsjóði EES og fjallar um störf vísindafólks sem upprunnið er frá Portúgal og lifir og starfar á Íslandi. Verkefnið ber yfirskriftina “Portugal and Iceland: investigating biodiversity and world changes together”.
Greinina má nálgast HÉR |
Náttúrustofa SuðvesturlandsFréttir af daglegri starfsemi stofunnar Archives
May 2024
Categories |